News detail

Nyakubahwa Perezida w’Urukiko rw’Ikirenga yatangije umwaka w’ubucamanza

Kigali, 4 Nzeri 2026 | Rt. Hon. MUKANTAGANZWA Domitilla, Perezida w’Urukiko rw’Ikirenga yatangije Umwaka w’Ubucamanza wa 2026 – 2027 agaragaza ibyagezweho mu Mwaka w’Ubucamanza 2025/2026 n’ibiteganyijwe mu mwaka wa 2026/2027 watangijwe.

Mu ijambo rye, https://tinyurl.com/4dmkpfx8, yagaragaje ko mu Mwaka w’Ubucamanza 2025/2026 hinjiye imanza 109.417, zaje zisanga 54.278 zasigaye zitaburanishijwe mu Mwaka w’Ubucamanza wa 2024/2025. Mu manza zaburanishijwe mu mizi uko ari 109.555, izaciwe n’inkiko binyuze mu iburanisha risanzwe (litigation) ni 89.667, zihwanye na 82 %, naho izaciwe binyuze mu nzira z’ubutabera nsanasano, ari zo Ubuhuza (Mediation), ubwumvikane bushingiye ku kwemera icyaha (Plea bargaining) n’ubuhuza hagati y’uwakorewe icyaha n’uwakimukoreye (Victim-offender Mediation), ni 19.888, zihwanye na 18%.

Perezida w’Urukiko rw’Ikirenga, Mukantaganzwa Domitilla, yerekanye ko Urwego rw’Ubucamanza rwishimira ko rwagumye ku ntego yarwo yo guha abarugana ubutabera bunoze agira ati: “Urwego rw’Ubucamanza rurishimira ko rwagumye ku ntego yarwo yo guha abarugana ubutabera bunoze kandi mu gihe gikwiriye.”

Perezida w’Urukiko rw’Ikirenga kandi yibukije ko Urwego rw’Ubucamanza ruzakomeza gushishikariza ababuranyi gukoresha inzira z’ubutabera nsanasano mu gukemura ibibazo bafitanye, kandi ruzafatanya n’izindi nzego mu ivugururwa ry’amategeko y’imiburanishirize y’imanza, ku buryo ababuranyi bazajya babanza kugerageza inzira y’ubutabera nsanasano.

Urwego rw’Ubucamanza kandi ruzakomeza gushyira imbaraga mu guca imanza hashingiwe ku mirongo yatanzwe n’inkiko nkuru no gushishikariza izindi nzego zifite uruhare mu gutanga ubutabera kuyikoresha, rutibagiwe no guteza imbere ikoreshwa ry’ikoranabuhanga hagamijwe kwihutisha itangwa rya serivisi z’ubutabera.

Umuhango wo gutangiza umwaka w’ubucamanza witabiriwe n’abancamanza, abanditsi b'inkiko, abashinjacyaha, abanyamategeko n'abandi bagize Ururana rw'Ubutabera n'abafatanyabikorwa barwo.